Samir Abasov: "Belə vəziyyətlərdə bilmirik, sevinək, ya kədərlənək"

"İlk qalibiyyətdir. Nə qədər ağır olsa da, ilkdir. Belə vəziyyətlərdə bilmirik, sevinək, ya kədərlənək".

"Report"un məlumatına görə, bunu "Sumqayıt"ın baş məşqçisi Samir Abasov Gəncədə "Kəpəz"ə 1:0 hesabı ilə qalib gəldikləri Azərbaycan Premyer Liqasının XVI tur oyunundan sonra mətbuat konfransında deyib.

44 yaşlı mütəxəssis bildirib ki, qələbəyə səbəb futbolçuların özlərini oyuna maksimum kökləməsi olub: "Azlıqda qalsaq da, qol vura bildik. İlk dəqiqələrdən göstərdik ki, qalib gəlmək istəyirik. Hər kəsi təbrik edirəm. Kubok matçında burada uduzmuşduq. Buna baxmayaraq, fanatlar yenə bizi tək qoymadı. Onlara təşəkkür edirəm".

Start heyətində radikal dəyişikliklərə əl atan baş məşqçi bunun vacib olduğunu söyləyib: "Dəyişikliklərin gözlənildiyini demişdik. Meydanda və meydandan kənarda da işlər görürük. Ofisdə gördüyümüz işlər meydançadakını ötüb keçib. Futbolçulara çatdırmaq lazım idi ki, bu gün uddun, uduzdun, müqavilən var, ya yoxdur, bizlik deyil. Heyətimiz kasad olsa da, bu addımı atmaq məcburiyyətində qalsaq da, edəcəyik".

O, Araz Abdullayevin göndərilməsinə də toxunub: "Çağırdım və onunla danışdım. Hər şeyi izah etdim. Tək Araz yox, Damian Daniçiç də gedib. Arazın göndərilməsi biz tərəfdən oldu".

Abasov heyətlə bağlı növbəti mümkün dəyişikliklərə də toxunub: "İndi bu barədə danışmağımız düzgün olmaz. Qışa çox qalmayıb. Hamınız hər şeyi biləcəksiniz. Vəziyyətimiz kritikdir. İstədiyimiz futbolçular baxacaqlar ki, 10 komanda var, sonuncu sıradayıq. Turnir cədvəlinə baxıb, imtina edənlər var. Biz əvvəlcə maddiyatı yox, vəziyyətimizi göstəririk. İşimiz çox çətindir və qışdan sonra da bunu yaşayacağıq".

Mütəxəssis "Neftçi"də rəhbərliyiniz altında oynamış futbolçulardan kimi "Sumqayıt"da görmək istəyərdiniz?" sualına isə belə cavab verib: "Emin Mahmudovu istəyərdim (gülür)".