Əhməd Yusifov bürünc medalın sahibi olub

Bu gün Monteneqronun paytaxtı Podqoritsada cüdo üzrə Avropa çempionatına start verilib.

QELEBE.AZ xəbər verir ki, yarışın ilk günündə Azərbaycan millisinin 5 idmançısı tatamiyə çıxıb.

Cüdoçularımız Avropa çempionatında ilk medala sahib olublar. Əhməd Yusifov bürünc qazanıb.

60 kq çəki dərəcəsində Əhməd Yusifov yarışa 1/16 finaldan qoşulub. İzhak Aşpizə (İsrail) qalib gələn cüdoçu mərhələ adlayıb. O, ikinci görüşündə Aleksandru Matei (Rumıniya) də mübarizədən kənarlaşdırsa da, 1/4 finalda Luka Mxeidzeyə (Fransa) uduzub.

Yusifov bürünc medal uğrunda ispaniyalı Fransisko Qarriqosla üz-üzə gəlib. Təmsilçimiz üçqat Avropa çempionuna ipponla qalib gələrək, Avropa çempionatında komandamıza ilk medalı qazandırıb.