Qaşım Maqomedov: "Həyatda və idmanda hər zaman ədalətli oyun prinsiplərinə riayət etməyə çalışmışam"

Azərbaycan taekvondoçusu Qaşım Maqomedov Yunanıstanda layiq görüldüyü “Ədalətli oyun ruhu” mükafatı ilə bağlı düşüncələrini bölüşüb.

O, "QELEBE.AZ"a açıqlamasında mükafata layiq görülməsini böyük şərəf hesab edib.

İdmançı həyatda və idmanda həmişə ədalətli oyun prinsiplərinə riayiət etməyə çalışdığını söyləyib:

“Ədalətli oyun ruhu” mükafatını almaq mənim üçün böyük şərəfdir. Bu mükafat mənə Yay Olimpiya Oyunlarında rəqibimə göstərdiyim nümunəvi davranışa görə təqdim olunub. Feyr-pley dəyərlərinə verilən xüsusi qiymətə görə namizədliyimi irəli sürən Azərbaycan Milli Olimpiya Komitəsinə, Avropa Ədalətli Oyunlar Hərəkatına və münsiflər heyətinə təşəkkürümü bildirirəm. Ədalətli oyun bir həyat tərzidir. İstər idmanda, istərsə də hər bir anımızda bizim seçimimiz var — hörmət, dürüstlük və ləyaqətlə davranmaq. Həyatda və idmanda hər zaman ədalətli oyun prinsiplərinə riayət etməyə çalışmışam".

Qeyd edək ki, Paris-2024-ün gümüş mükafatçısı idmanda nümunəvi davranışına və etik dəyərlərə sadiqliyinə görə Yunanıstanın Olimpiya şəhərində keçirilən tədbirdə Avropa Ədalətli Oyunlar Hərəkatının “Ədalətli oyun ruhu” mükafatına layiq görülüb.