Milli komandalarda ən çox oyun keçirən baş məşqçilər bəlli olub

Milli komandalarda ən çox oyun keçirən baş məşqçilərin adları müəyyənləşib.

“Report”un məlumatına görə, Fransa yığmasının çalışdırıcısı Didye Deşam Qətərdə keçirilən dünya çempionatındakı matçlar sayəsində ilk “10-luğ”a düşə bilib.

2012-ci ildən “üçrənglilər”ə rəhbərlik edən mütəxəssis hazırda siyahının 10-cu pilləsində qərarlaşıb. Deşam dekabrın 18-də DÇ-2022-nin final qarşılaşmasında komandasını Argentina seçməsi üzərinə çıxarmaqla daha bir addım irəliləyəcək. Bu, 54 yaşlı məşqçinin millidə 139-cu görüşü olacaq. Bununla Deşam 9-cu sıradakı mərhum ingiltərəli Uolter Vinterbottoma çatacaq.

Cədvələ Lars Laqerbek başçılıq edir. İsveçli mütəxəssis karyerası ərzində üç fərqli millidə 228 oyuna çıxıb. İkinci pillədə Azərbaycan yığmasının sabiq baş məşqçisi Berti Foqts qərarlaşıb. 2008-2014-cü illərdə Azərbaycan millisinə rəhbərlik etmiş almaniyalı ümumilikdə 205 matçda iştirak edib.