Tokio Olimpiadasında Azərbaycana bürünc medal qazandırmış boksçu Paris-2024-də çəkisini dəyişəcək

Azərbaycan millisinin boksçusu Alfonso Dominges Paris-2024 Yay Olimpiya Oyunlarında çəkisini dəyişəcək.

Bu barədə “Report”a Tokio-2020 Yay Olimpiya Oyunlarının bürünc mükafatçısı özü məlumat verib.

Son olaraq ötən ilin noyabrında Polşada keçirilən beynəlxalq turnirdə 86 kq çəki dərəcəsində mübarizə aparan Kuba əsilli 28 yaşlı boksçu 2024-cü ildəki olimpiadada 91 kq-da qüvvəsini sınamağı planlaşdırır.

O, bunun üçün ilk növbədə Paris-2024-ə lisenziya qazanmağa çalışacağını söyləyib: “Yenidən olimpiadaya qatılmaq üçün bu il keçiriləcək dünya çempionatında və Avropa Oyunlarında uğurlu çıxış etməyə çalışacağıq”.

Qeyd edək ki, Alfonso Dominges 2021-ci ildə Tokioda təşkil olunan olimpiadada 81 kq çəkidə yarışıb.