Azərbaycan Premyer Liqası: Tovuzda qərb derbisi, Bakıda prinsipial oyun

Azərbaycan Premyer Liqasının XXII turunda bu gün daha iki oyun keçiriləcək.

"QELEBE.AZ"un məlumatına görə, hər iki qarşılaşma öz prinsipiallığı ilə seçilir.

Günün ilk matçı Tovuzda baş tutacaq. Hazırda 20 xalla 6-cı pillədə olan "Turan Tovuz" qərb derbisində özündən 6 xal az toplayan və 9-cu sırada qərarlaşan "Kəpəz"i qəbul edəcək.

Komandalar indiyədək ölkə çempionatında 2 dəfə üz-üzə gəliblər. Mövsümün ilk yarısına təsadüf edən oyunların birində Tovuz təmsilçisi qələbə qazanıb, digəri isə heç-heçə başa çatıb. Topların fərqi də Ayxan Abbasovun baş məşqçi olduğu komandanın xeyrinədir - 2:0.

Günün son görüşündə isə ilk iki pillədə yer alan "Qarabağ" və "Sabah" klubları qarşılaşacaqlar. Hazırda Ağdam təmsilçisi 57 xalla turnir cədvəlinə başçılıq edir. Bakı klubu isə 52 xalla son ölkə çempionunun ən yaxın izləyicisidir.

Bu iki kollektiv arasında 18-ci Premyer Liqa oyunu olacaq. Əvvəlki 17 matçın 12-si "köhlən atlar"ın xeyrinə başa çatıb. 5 qarşılaşmada isə qalib müəyyənləşməyib. "Qarabağ"ın vurduğu 33 qola "Sabah" cəmi 9 topla cavab verə bilib.

Qurban Qurbanovun baş məşqçi olduğu komanda heç vaxt rəqibinə uduzmayıb. Ağdamlıların meydanında baş tutmuş son üç görüşdə hər iki kollektiv qol vurub.

Azərbaycan Premyer Liqası

XXII tur

11 fevral (şənbə)

14:00. "Turan Tovuz" - "Kəpəz"
Hakimlər: Cavid Cəlilov, Rahil Ramazanov, Müslüm Əliyev, Rəşad Əhmədov
Hakim-inspektor: İmanxan Sultani
AFFA nümayəndəsi: İlham Əliyev
Tovuz şəhər stadionu.

17:00. "Qarabağ" - "Sabah"
Hakimlər: Elçin Məsiyev, Pərvin Talıbov, Kamran Bayramov, Kamranbəy Rəhimov
Hakim-inspektor: Anar Salmanov
AFFA nümayəndəsi: Elçin Məmmədov
“Azersun Arena”.

Qeyd edək ki, XXII turun Qəbələdə keçirilən açılış oyununda yerli komanda "Neftçi" ilə qolsuz heç-heçəyə razılaşıb. Tura fevralın 12-də keçiriləcək "Səbail" - "Zirə" və "Sumqayıt" - "Şamaxı" matçları ilə yekun vurulacaq.