Selcan Mahsudova: "Finalda bundan da yaxşı nəticə göstərəcəyəm"

"Finalda bundan da yaxşı nəticə göstərəcəyəm".

Bunu "Report"a açıqlamasında batut gimnastikası üzrə Azərbaycan millisinin üzvü Selcan Mahsudova Bakıda keçirilən Dünya Kubokundakı çıxışı barədə danışarkən deyib.

Qadınlar arasında fərdi təsnifatda 53.370 xalla finala yüksələn 20 yaşlı idmançı yeni proqramda çıxış etdiyini xatırladıb. Mahsudova ikinci cəhdə ehtiyac duymamasının səbəbini də izah edib: "Proqramım yeni idi. Bu, iki dəfə üçlü saltodan ibarətdir. Bunu rahat keçə bildiyim üçün sevinirəm. Məşqçi ilə məsləhətləşdik və birlikdə qərara aldıq ki, ikinci dəfə batut üzərinə çıxmağa ehtiyac yoxdur".

Mahsudova təsnifatda ən yaxşı nəticə göstərən braziliyalı gimnastları həlleci yarışda üstələyəcəyinə inanır: "Finala vəsiqə qazanan bütün rəqiblərimə hörmətlə yanaşıram. Braziliyalı gimnastlar çox güclüdürlər. Amma finalda onları keçəcəyimə inanıram".

Qeyd edək ki, Milli Gimnastika Arenasında təşkil edilən Dünya Kubokunun 8 idmançı arasında keçiriləcək final raundu fevralın 19-da olacaq.