Otuza yaxın ölkə Rusiya və Belarus idmançılarının olimpiadada iştirakına qarşı çıxıb

ABŞ, Böyük Britaniya, Almaniya və Fransa da daxil olmaqla 30-a yaxın ölkə Rusiya və Belarus idmançılarının Paris-2024 Yay Olimpiya Oyunlarında iştirakına qarşı çıxıb.

"QELEBE.AZ" "Associated"ə istinadən xəbər verir ki, bununla bağlı Beynəlxalq Olimpiya Komitəsinə (IOC)-a birgə etiraz məktubu ünvanlanıb.

Həmin ölkələr Rusiya və Belarus idmançılarının neytral statusda nüfuzlu yarışlarda mümkün iştirakı məsələsi ilə bağlı IOC-dan izahat tələb ediblər. Bildirilib ki, təfərrüatlar aydınlaşanadək iki ölkə təmsilçiləri beynəlxalq arenaya iştiraka buraxılmamalıdırlar: "Biz Rusiya və Belarus idmançılarının olimpiya oyunlarında neytral statusda iştirak etmələrinin nə dərəcədə məqbul olmasından narahatıq. Rusiya idmançıları ilə hərbçiləri arasında möhkəm əlaqələr bizi də narahat edir. Ümumi mövqeyimiz həmişə milli mənsubiyyətə görə ayrı-seçkiliyin yolverilməzliyi olub, lakin bu narahatlıqlar IOC çərçivəsində həll edilməlidir", - məktubda vurğulanıb.

Qeyd edək ki, Ukraynaya hərbi müdaxilə səbəbindən Rusiya və Belarus idmançılarının beynəlxalq yarışlarda iştirakına qadağa qoyulub.