“Top-5” liqalarda ən çox kobudluğa məruz qalan futbolçular açıqlanıb

Avropanın “Top-5” liqalarında ən çox kobudluğa məruz qalan futbolçuların adları açıqlanıb.

“QELEBE.AZ” “Marca”ya istinadən xəbər verir ki, siyahıya İspaniyanın “Real Madrid” klubunun hücumçusu Vinisyus Junior başçılıq edir.

Braziliyalı forvard bu mövsüm bütün turnirlərdə 135 dəfə kobudluqla dayandırılıb. Bu göstəricidə ikinci yeri İtaliyanın “Latsio” klubunun yarımmüdafiəçisi Mattia Zakkani (93 cərimə), üçüncü pilləni isə Fransa PSJ-sinin ön xətt oyunçusu Neymar (90 cərimə) tutur.

Vinisyus ən çox vərəqə alan futbolçuların siyahısında da ön sıralardadır. Gənc oyunçu 11 dəfə sarı vərəqə ilə cəzalandırılıb. O, yalnız PSJ-nin yarımmüdafiəçisi Marko Verratti və Almaniya “Bayer”inin orta sahə oyunçusu Robert Andrixdən geri qalır. Adıçəkilən futbolçuların passivində 12 rəsmi xəbərdarlıq var.