Sabiq baş məşqçisi "Sabah"a inanır: "Avrokuboklarda bir neçə mərhələ keçəcəklər"

"Əminəm ki, avrokuboklarda bir neçə mərhələ keçəcəklər".

Bunu "QELEBE.AZ"a açıqlamasında "Sabah"ın sabiq baş məşqçisi Jelko Sopiç Bakı klubunun tarixində ilk dəfə avrokuboklara vəsiqə qazanması barədə danışarkən deyib.

Xorvatiyalı mütəxəssis bu uğura görə keçmiş komandası ilə fəxr etdiyini bildirib: "Sabah" gənc komandadır. Bu, onlar üçün böyük nailiyyətdir. Klubdakı bütün insanları təbrik edirəm".

Sopiçin sözlərinə görə, onun vaxtında "Sabah"ın heyətində bu cür keyfiyyətli futbolçular yox idi: "O dövrdən indiyədək çox şey dəyişib. "Qarabağ" kimi komanda ilə eyni səviyyədə olmaq istəyirsənsə, top-futbolçuların olmalıdır. Orta səviyyəli oyunçularla ciddi uğurlar qazana bilməzsən. Bu, Xorvatiyada da belədir. "Dinamo" və "Hayduk"la başabaş mübarizə aparmaq üçün yaxşı heyətə sahib olmalısan. Səviyyəli futbolçuların yoxdursa, bunu etmək qeyri-mümkündür. Həmçinin, mən "Sabah"da çalışarkən pandemiya dövrü idi, yaxşı futbolçular gətirmək asan deyildi. Yollar bağlanmışdı. Dəqiq yadımda deyil, səhv etmirəmsə, avroboklar zonasından 4-5 xal geridə olarkən çempionatı vaxtından əvvəl bitirdilər. Demirəm ki, 100 faiz mükafatçılar sırasına düşə bilərdik. Lakin buna yaxın idik. Bilirsiniz, indi bu, elə də vacib deyil. Ən önəmlisi, "Sabah" əla mövsüm keçirir, klubda hamı xoşbəxtdir. Bu durumdan zövq ala bilərlər".

O, özünü "Sabah"ın hazırkı baş məşqçisi Murad Musayevlə müqayisə etmək istəmədiyini söyləyib: "Rusiyada yaxşı nəticələr qazanmış mütəxəssisdir. Eyni uğuru Azərbaycanda da təkrarladı. Nəticə verirsənsə, hamı səni top-məşqçi hesab edəcək. Amma dünyanın ən yaxşı mütəxəssisi olsan belə, uğursuz nəticələrə görə hər kəs səni qınayacaq, bacarığına şübhə ilə yanaşacaq. Musayevi şəxsən tanımıram, lakin "Sabah"a qazandırdığı uğura görə onu təbrik edirəm. Ümumiyyətlə, özümü hansısa həmkarımla müqayisə etməyi xoşlamıram. Hamımız eyni işin içindəyik. Çemodanımız daim yanımızda olmalıdır. Çünki nəyin necə olacağını bilmirik".

Qeyd edək ki, Jelko Sopiç 2019/2020 mövsümündə "Sabah"a başçılıq edib.