Premyer Liqa: “Kəpəz”lə “Turan Tovuz” Qəbələdə qarşılaşacaq

Azərbaycan Premyer Liqasında XXX tur davam edir.

“QELEBE.AZ”un məlumatına görə, bu gün turun bir oyunu keçiləcək.

Günün yeganə matçında “Kəpəz”lə “Turan Tovuz” komandaları üz-üzə gələcəklər. Gəncə şəhər stadionunun ot örtüyü yararsız halda olduğu üçün Qərb derbisi Qəbələdə oynanılacaq. Turnir cədvəlində qonşu olan bölgə təmsilçilərinin dueli “Kəpəz” üçün xüsusi önəm kəsb edir. Çünki gəncəlilər məğlub olacaqları təqdirdə, autsayderlər zonasına bir qədər də yaxınlaşa bilərlər.

Eyni zamanda, “Kəpəz” “Turan Tovuz” üzərində ilk qalibiyyətini əldə etməyə çalışacaq. Cari mövsüm baş tutan üç qarşılaşmanın birində heç-heçə qeydə alınıb, ikisində tovuzlular qələbəyə seviniblər. Tərlan Əhmədovun kollektivi rəqibin qapısına hələ qol da vura bilməyib.

Hazırda “Turan Tovuz” 29 xalla altıncı, “Kəpəz” isə 25 xalla yeddinci pillədə qərarlaşıb.

Qeyd edək ki, tura aprelin 16-da keçiriləcək “Şamaxı” – “Sumqayıt” və “Sabah” – “Qarabağ” matçları ilə yekun vurulacaq.

Premyer Liqa

XXX tur

15 aprel

16:00. “Kəpəz” – “Turan Tovuz”

Baş hakim: Əliyar Ağayev

Qəbələ şəhər stadionu