Tərlan Əhmədov: “Baş verənlərdən sığortalanmamışıq”

“Hər halda böyükhesablı məğlubiyyət, ümumiyyətlə, məğlubiyyət xoş deyil. Futbolda baş verə biləcəklərdən sığortalanmamışıq”.

“QELEBE.AZ” xəbər verir ki, bunu “Kəpəz”in baş məşqçisi Tərlan Əhmədov Azərbaycan Premyer Liqasının 9-cu turunun “Sabah”la oyununda sonra deyib.

Mütəxəssis 0:5 hesablı məğlubiyyətin qəbuledilməz olduğunu bildirib: “Komanda oyuna pis başlamadı. Rəqibin səviyyəsi və bizim komandanın da tam oyun fəlsəfəsinə uyğunlaşmaması matçın gedişatında planların pozulması ilə nəticələndi. Giorgi Kantariyanın meydanda olmaması orta xəttdə bizim üçün böyük problem yaratdı. Komandanın 3 oyun yaxşı oynayıb, 1 oyun zəif oynaması təsadüf deyil. Görüləcək işimiz var. Futbolçular bu gün həddindən artıq əziyyət çəkdilər, güc sərf etdilər. Buna baxmayaraq, fərdi səhvlərdən buraxdığımız qollar komandanı məğlubiyyətə apardı”.

Baş məşqçi məğlubiyyətdə özünün günahkar olduğunu bildirib: “Düşünürəm ki, bu məğlubiyyətin səbəbkarı mənəm. Futbolçunun burada günahı yoxdur. Həyat davam edir, qarşıda hələ oyunlarımız var. Bu oyunu analiz edib buraxdığımız səhvləri minimuma endirməliyik. Qarşıda "Neftçi" ilə görüşümüz var. Komanda toparlanmalıdır. Yenə deyirəm, məğlubiyyət xoş deyil. Görəcəyimiz iş həddindən artıq çoxdur".