Azərbaycan millisinin futbolçusu: Hədəf İsveçrə millisindən də xal almaqdır

Qarşılaşma çox ağır keçdi. Sonadək döyüşüb mübarizə apardıq. Hədəfimiz Bakıda İsveçrədən də xal almaqdır.

Bunu "QELEBE.AZ"a açıqlamasında Azərbaycan millisinin futbolçusu Sevinc Cəfərzadə səfərdə Macarıstanla heç-heçə (1:1) etdikləri Avropa çempionatının seçmə mərhələ oyunu barədə danışarkən deyib.

Kapitan görüşün çox ağır keçdiyini bildirib: "Sonadək döyüşüb mübarizə apardıq. Oyun planından çıxmamağa çalışdıq və sonda nəticə əldə edə bildik. Bu, səbir, dözüm və xarakter sayəsində mümkün oldu. B Liqasında artıq daha güclü komandalar yer alır. Düşdüyümüz qrup bunun sübutudur. Amma bu hal bizi sevindirir. Çünki artıq Azərbaycanda qadın futbolunda bu yerlərə gəlib çıxa bilmişik".

Matçda penaltidən fərqlənən oyunçu komandasının ona güvəndiyini vurğulayıb: "Belə penaltilər məsuliyyət tələb edir. Özümə də həmişə inanıram. Daha əvvəl Kiprlə səfər matçında qapıçı penaltini dəf etmişdi. Bu qol isə komandaya əlavə güc və motivasiya verdi. Növbəti qarşılaşma aprelin 9-da Bakıda olacaq. İsveçrənin adı, onların necə güclü komanda olmasından xəbər verir. Bu görüşdə var gücümüzlə döyüşəcəyik".