Bakıdakı Dünya Kubokunda iştirak edəcək Azərbaycan gimnastları açıqlanıb

22-23 fevralda Bakıda keçiriləcək batut gimnastikası və tamblinq üzrə Dünya Kubokunda çıxış edəcək Azərbaycan idmançıları bəlli olub.

Bu barədə "QELEBE.AZ"a Azərbaycan Gimnastika Federasiyasının mətbuat xidmətindən məlumat verilib.

Ölkəni qadınlar arasında Dünya kubokunun gümüş mükafatçısı, FIG kubokunun sahibi Selcan Mahsudova və "Batut gimnastikası üzrə 6-cı Bakı birinciliyi"nin I yeri Şəfiqə Hümbətova, kişilər arasında dünya yaş qrupları yarışlarının qalibi, beynəlxalq turnirlərin qalibləri Nicat Mirzəyev (fərdi və sinxron çıxışlar) və Mehdi Əliyev (fərdi çıxış), Avropa çempionu Əli Niftəliyev təmsil edəcək. Yarışda ilk dəfə olaraq batut gimnastikası üzrə qarışıq sinxron cütlüklər çıxış edəcək.

Tamblinq üzrə yarışda isə komanda hesabında Dünya çempionları Tofiq Əliyev və Adil Hacızadə, Avropa çempionatının komanda hesabında I yer qalibi Hüseyn Əsədullayev və beynəlxalq turnirlərin qalibi Aleksey Karataşov təmsil edəcək.

Qeyd edək ki, yarışda 16 ölkədən idmançılar fərdi və sinxron proqramlar üzrə qələbə uğrunda mübarizə aparacaqlar.