Azərbaycanın çimərlik futbolu millisinin baş məşqçisi: "Kağız üzərində komandamız favorit görünür"

Kağız üzərində komandamız favorit görünür.

Bunu "Report"a açıqlamasında Azərbaycanın çimərlik futbolu millisinin baş məşqçisi Sahib Məmmədov Avropa çempionatının I seçmə mərhələsinin püşkünü dəyərləndirərkən deyib.

Mütəxəssis qrupun nə asan, nə də çətin olduğunu söyləyib:

“Qrupda Litva, İngiltərə və Belçika ilə qarşılaşacağıq. Bizim üçün nə asan, nə də çox çətin qrupdur. Bu komandalar B Liqasında güclü sayılırlar. Kağız üzərində komandamız favorit görünür. Qrupda ilk üç yeri tutan komandalar superfinala vəsiqə qazanacaqlar. İnanıram ki, biz də növbəti mərhələyə keçəcəyik. Məqsədimiz qrupdakı hər üç oyunda qələbə qazanıb birinci yeri tutmaqdır”.

Baş məşqçi artıq hazırlığa start verdiklərini deyib:

“Bir həftədir hazırlığa başlamışıq. Əslində qışda da məşq edirdik. Lakin soyuq olduğu üçün məşqlərin sayı az olurdu. Artıq həftədə 3-4 məşqə çıxırıq”.

Qeyd edək ki, Avropa çempionatının I seçmə mərhələsində millimiz A qrupunda Litva, İngiltərə və Belçika ilə mübarizə aparacaq. Bu qrupun oyunları mayın 23-25-də İspaniyanın El Puerto de Santa Mariya şəhərində keçiriləcək.