Kvemo Kartlidə yaşayan azərbaycanlı idmançılar ilk dəfə Gürcüstan Kubokunda iştirak edirlər

Tbilisidə yerləşən Gimnastika Arenasında Uşu Sanda üzrə IX Gürcüstan Kuboku keçirilir.

"QELEBE.AZ"un Gürcüstan bürosu xəbər verir ki, turnirdə Gürcüstanın müxtəlif bölgələrindən olan komandalarla yanaşı, ilk dəfə olaraq Kvemo Kartli bölgəsini təmsil edən azərbaycanlı idmançılar da iştirak edirlər.

Kvemo Kartli Uşu-Sanda Federasiyası bu ilin mart ayında yaradılıb və turnirdə 8 yaşdan yuxarı olan 32 döyüşçü 4 yaş kateqoriyası üzrə rinqə çıxır. Yarışdan əvvəl bölgədə 20 günlük hazırlıq mərhələsi təşkil olunub.

Federasiyanın prezidenti, Azərbaycanın dünya və Avropa çempionu Canpolad Budaqov, məşqçi Əli Qənbərov “QELEBE.AZ"un Gürcüstan bürosuna bildiriblər ki, turnir azərbaycanlıların iştirak etdiyi ilk genişmiqyaslı rəsmi idman tədbiridir. Komanda artıq ilk uğurunu da əldə edib – Cəlilov Qeyrət Bəhlul oğlu döyüşdə qalib gəlib.

Yarış iki gün davam edəcək. Yarışdan sonra idmançılar Tbilisidəki Heydər Əliyev büstünü ziyarət edəcək və turnirdəki uğurlar ümummilli liderin doğum gününə həsr olunacaq. Turnir eyni zamanda yeni mövsümün açılışı hesab olunur və gələcək beynəlxalq yarışlara hazırlıq xarakteri daşıyır.