“Neftçi”nin futbolçusu: “Məndən fərqli, bütün Azərbaycan “Qarabağ”a azarkeşlik edəcək”

“Məndən fərqli olaraq, bütün Azərbaycan “Gent”lə görüşdə “Qarabağ”a azarkeşlik edəcək. Mənim vəziyyətim bir az fərqlidir”.

Bunu “Report”a müsahibəsində “Neftçi”nin futbolçusu Kenni Sayef vaxtilə formasını geyindiyi Belçikanın “Gent” klubunun UEFA Konfrans Liqasının pley-off mərhələsində “Qarabağ”la bu gün keçirəcəyi cavab oyunu ilə bağlı danışarkən deyib.

30 yaşlı yarımmüdafiəçi 2014-2018-ci illərdə şərəfini qoruduğu “Gent”i özünə doğma komanda adlandırıb: “Gent” mənim evimdir, ora ilə bağlı gözəl xatirələrim var. Həmişə bu komandanın fanatı olacağam. Ona görə yox ki, “Qarabağ”la qarşılaşacaqlar. Bilirəm ki, “Qarabağ” bu mərhələni adlasa, Azərbaycan futbolu üçün yeni uğur olacaq”.

Sayef Bakıda 1:0 hesablı qələbə qazanan “Qarabağ”ın səfər matçına üstün çıxacağını sözlərinə əlavə edib: “Hər iki komanda çox yaxşıdır. “Qarabağ” Bakıda qalib gəldiyi üçün 1 qolluq üstünlüyə malikdir. Çox maraqlı mübarizə olacaq”.

Kenni Sayefin müsahibəsinin tam versiyasını buradan oxuya bilərsiniz.