Gəncədə cüdo üzrə ustad dərsi keçirilib

Azərbaycan Cüdo Federasiyası (ACF) Gəncə şəhərində “Gəncə Mall”da təcrübəli cüdo mütəxəssislərinin iştirakı ilə ustad dərsi təşkil edilib.

"Report"un Qərb bürosunun məlumatına görə, ustad dərsi zamanı ictimaiyyətə cüdonun fəlsəfəsi, onun uşaqların və gənclərin mənəvi və fiziki tərbiyəsində oynadığı rol barədə məlumat verilib.

Tədbirdə çıxış edən ACF prezidentinin müşaviri Natiq Bağırov hər kəsi ustad dərslərində iştirak etməyə dəvət edib.

O, bildirib ki, bu cür layihələrin həyata keçirilməsində məqsəd idmanla məşğul olan uşaqların, gənclərin sayını artırmaq və cüdo idman növünü təbliğ etməkdir.

Ustad dərsi zamanı N.Bağırov 2022-ci ildə gənclər arasında Avropa çempionatının qızıl medalçıları Vüqar Talıbov və Vüsal Qələndərzadə ilə birgə müxtəlif cüdo fəndlərinin yerinə yetirilməsini uşaqlara və gənclərə nümayiş etdiriblər, sakinlərlə söhbət ediblər və onları cüdo ilə məşğul olmağa dəvət ediblər.

İştirakçılara cüdonun fəlsəfəsi və cüdoçuların əməl etməli olduqları qaydalar haqqında geniş məlumat verilib.

Sonra iştirakçılar üçün viktorinalar təşkil olunub, cüdo idman növü üzrə müxtəlif suallar verilib və düzgün cavab verən şəxslərə hədiyyələr təqdim olunub.