Kaka: “Qazaxıstan və Azərbaycan qrupun ən güclüləridir”

“Qazaxıstan və Azərbaycan qrupun ən güclüləridir. Hər iki komandanın qrupda ilk iki yeri tutmaq üçün yaxşı imkanları var.”

“QELEBE.AZ”un məlumatına görə, bunu Qazaxıstan futzal millisinin baş məşqçisi Kaka Azərbaycana 4:2 hesabı ilə qalib gəldikləri DÇ-2024-ün elit mərhələ oyunundan sonra mətbuat konfransında deyib.

Braziliyalı mütəxəssis komandasının çıxışından razılıq bildirib: “Başqa cür gözləmirdim. Azərbaycanla aramızda oyunlar həmişə gərgin keçib. Aktaudakı görüşdə də eyni bugünkü ssenaridə keçmişdi. Çox maraqlı oyun keçdi. Bizim üçün 3 xal vacib idi və buna nail olduq. Qələbəyə layiq idik”.

O, komandasının birinci hissədə hesabda geri düşməsinə baxmayaraq, sonda qələbə qazanmasını belə əsaslandırıb: “Fasilədə futbolçulara dedim ki, eyni formada pressinq etməlisiniz, gec-tez qollar gələcək. Bunu da bacardıq”.

Baş məşqçi cavab matçından gözləntilərini də bildirib: “Azərbaycan çox güclü rəqibdir. Görüşə ciddi hazırlaşacağıq. Qazaxıstanda oynayacağımız üçün müəyyən üstünlüyümüz ola bilər. Amma yenə də görüşə ciddi yanaşacağıq”.