Renat Dadaşov “Qrasshopper”in təlim-məşq toplanışına gec qoşulacaq

Azərbaycan millisinin futbolçusu Renat Dadaşov İsveçrə klubu “Qrasshopper”in 2023/2024 mövsümü öncəsi yay təlim-məşq toplanışına gec qoşulacaq.

“QELEBE.AZ” xəbər verir ki, bu barədə yerli “Blick” nəşri məlumat yayıb.

Bildirilib ki, Super Liqa təmsilçisi mövsümlərarası hazırlığa iyunun 19-da Bazeldə start verəcək. Lakin Dadaşov da daxil olmaqla, 4 oyunçu toplanışın ilk günlərində düşərgədə olmayacaq. Səbəb isə odur ki, onlar həmin vaxt milli komandalarında yer alacaqlar.

Yəni Dadaşov iyunun 17-də AVRO-2024-ün seçmə mərhələsində Estoniya ilə “Dalğa Arena”da keçiriləcək oyunda Azərbaycan millisinin heyətində olacaq. Yığma üzvlərinə klubda əlavə bir neçə günlük istirahət veriləcək.

Qeyd edək ki, “Qrasshopper” İsveçrə çempionatında sona iki tur qalmış turnir cədvəlinin 6-cı pilləsində qərarlaşıb.